يا الشيخ تسند لك كبار المهمات

لـ محمد البياضي، ، في غير مصنف، آخر تحديث

يا الشيخ تسند لك كبار المهمات - محمد البياضي

ياراكب اللي لامشى يقطع البيد
في لحظة ٍيقطع بعيد المسافات
 
آخر طراز موديل سبعه بتحديد
عطوه حقه واتقنوه الخواجات
 
مافك بابه كل من يطرد الصيد
ولافحطوا به ناقلين الجهازات
 
ياراكبه عجل قبل عطلة العيد
أزكى سلام اوصله شيخ الحويطات
 
تلقاه في قصر ٍشمخ كنه الحيد
قصر طفح ظله كما ضلع ابانات
 
تنساق به صفر الدلال البغاديد
ملفى لمن لحقه من الوقت ميلات
 
عطه الجواب اللي من الايد للإيد
مضمون مابه ماهي من الروايات
 
ماهو غرام ولابعد قصة امريد
بعض الأمور وماانكتب فالمجلات
 
السالفه مريت ضيف ٍمن بعيد
من السعودية لدار القرابات
 
داراحكموها من خيار الصناديد
آل الشريف مهونين الصعيبات
 
على زماله لاعنان ٍولاقيد
مشروبها البنزين والمطعم الزات
 
موتر مهقويني على كيف ماريد
آخذ عليه ان غيم الجو سجات
 
من الحفيز مطلعه تو وجديد
الله وكيلك شيل مسى ولابات
 
خذوه ناس ٍما تعرف المناقيد
سرقان من كيس المناعير تقتات
 
والله لونه راح غصب ٍ وتهديد
قصته لدفنها كما دفن الأموات
 
هذي علومي جتك لاانقص ولازيد
ومثبته فيما حوتها الملفات
 
وصلتك يافيصل عسى عمرك يزيد
ياالشيخ تسند لك كبار المهمات

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2021 - موقع الشعر