ابيات غرد بها اخي وزميلي الاستاذ / مصطفى بن علي محمد الشعلان اثناء وفاة شقيقته وردي . - محمد البياضي

الابيات /
بالهون ياللي شلتوالنعش بالهون
ترفقو بالقلب لا تكسرونه
به بهجة فؤادي والى وين تكفون
باقي عيوني مااشبعت من عيونه
مرحوم ياللي راح مرضي ومصيون
صافي ضمير وطاهرات ٍ ردونه
ماانساه حتى اهل المقابر يقومون
وداعة اللي خيرمن يودعونه
الرد /
حركت هاجوس ٍ له اعوام مدفون
في داخلي واصحيت حتى جنونه
رافقني وقوت ٍ على طروق ولحون
وابكى الحمام اللي يهوزع لحونه
لفقديّ لناس ٍ غلاهم ماهو دون
وانتم غلاكم عندنا تعرفونه
يا مصطفى الشعلان والود مضمون
وصل وصداقة عمرراس ومتونه
لا باس وابياتك لها هلت عيون
وادّمت قلوب وكل قلب بشطونه
صابت نفوس وقلب صاحبك مطعون
منها وشكى منها وزادت حزونه
وصلته وامسى ضايق البال مغبون
والصدر ضاق وخاطره شان لونه
هذي مكانتها من العين فالنون
طيب ووفاء واخلاق واخت ٍ حنونه
بالخير مذكوره وبها ناس يدرون
من غيرنا وطيب ٍ بها يذكرونه
وانا بكلامي ما يجي شك وظنون
صحيح وان قلته وصل في حتونه
ولكم عزاي وعن وصولي تعذرون
والعذر لخواني وهم يقبلونه
واطلب لها الفردوس من خالق الكون
من يرسل الماء من مناشي مزونه

مناسبة القصيدة

ابيات غرد بها اخي وزميلي الاستاذ / مصطفى بن علي محمد الشعلان اثناء وفاة شقيقته وردي .
© 2024 - موقع الشعر