قصيده من الشاعر/ عبيدالله الزحيفاني وردي . - محمد البياضي

قصيده من الشاعر / عبيدالله الزحيفاني بمناسبة حضوره زواج احد ابنائي بالرغم لديه ظرف وردي عليه
 
قصيدة عبيدالله/
 
هاجت حروفي والقصايد تعابير
ومن الفرح بكتب من الشعر ديوان
وانسخ قلايد ورد واحلا الازاهير
واهدي لك الاشعار ورد ٍ وريحان
مبروك يا محمد وللفرح تعبير
يا طيب ٍ فيك الوفاء وفيك الاحسان
فيك الكرم والجود ما فيه تغيير
ومن المكارم فيك من كل الالوان
جتني رسالة عرسكم يالمناعير
حلفت لا احضره ولو كان ما كان
يامحمد اللي لك على البعد تصوير
صقرا تحلق فالمعالي بجنحان
شبل المراجل ما يجي منك تقصير
والشعر ما يوفي مقامك والاوزان
يحفظك ربي من شرور المقادير
وتبقى السعاده دايمه طول الازمان
 
الرد /
 
ترحيبة الخيّر بشوف الخطاطير
يا مرحبا ترحيبة ٍ شانها شان
اسوقها لك من حلوق المباهير
من دلة ٍ مختومه بختم رسلان
فنجال منها يزعج النوم ويطير
مهيّله من الهند والبن خولان
ترحيبة ٍتحوي جميع المعايير
الطيّبه في جيتك ياابوسلمان
جيّت وفاء جيّت معزه وتقدير
جيتك هذي ترجح بكل ميزان
بالرغم في ديوان بيتك مسايير
حضرت يا الصاحب وذا خير برهان
الظرف ما ردك ولا قلت ما يصير
جيت ووقفت بحفلنا وقفة حصان
شاركت ما قدمت بعض المعاذير
بالعون ما قصرت يا بن سليمان
مخلص كريم ولا حسبت المخاسير
ماانت بشحيح تجود والبال طربان
بك عرف ٍ وفهم ٍ وفطنه وتفكير
صايب مميز بالفراسه والاتقان
تشرّف ولا اتعرّف زيف ٍ وتزوير
محسوب من خيّرت طويلين الايمان
ووصلت بيوتك يا بعيد المشاوير
من طيبها تبدي على الضلع وتبان
طياتها تشّرق جمالاٍ وتنوير
متوجه بزهور من كل بستان
لوحة شعر مرسومه بريشة الطير
صعب ايتخيّل رسمها كل فنان
جسّدت فيها شعور شخصك بتأثبر
من ذاتك وترجمتها وانت قنعان
احساسك وما تملكه فيه تبرير
لك من وفاك ونخوتك يا بليهان
عساك تبقى بعز دايم وفي خير
ذخر وسند فالوقت محزم ومليان
واطلب عظيم يسيّرالعبد ويسير
انه يجملني معك يابوسلمان

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.

مناسبة القصيدة

قصيده من الشاعر / عبيدالله الزحيفاني بمناسبة حضوره زواج احد ابنائي بالرغم لديه ظرف وردي عليه .
© 2021 - موقع الشعر