لعنبوا من طلعك من بيت ابوك
استرح بالبيت كافينا وجع
كانها الكشخات والموضة حدْوك
عندك امك . . . طلعتك ملها سنع!!
ورد دش السوق وخلق الله شكوك
انهبلت وقلت والله و (السبع)
أستريحي لايهمّك مااذوك
القمر كل (ن) يشوفه لاطلع
لو تجرّوا باللقافه كلموك
قولي ان المسأله فيها شرع
ولو خواتك يالخشف ماطلعوك
كان قلبي من جمالك ماخضع
ليتهم يافتنة الطرقي نهوك
عن طلوع(ن) فجّر بسدّي نبع
صار شي(ن) اشبه بغزوة تبوك!!
انخذل به قوم وانتصروا ربع
اشهد ان بمشيتك ثقل الملوك
والحرس قدّام تردع من طمع
سامح الله يوم اهلك دلعوك
وسامح السوّاق (شوفير) الدلع!!
ماطرالي غير اركب ب( البيوك)
لو زعلت وقلت: ابعد ياورع!!
طق عرقي والغنج عطر السلوك
حسبي الله طار قلبي وانقطع
الزهر ماخالطه تعتيم شوك
خدّها البرّاق بعيوني لمع
من ورى المنديل مبسمها ضحوك
الهداوه فيه وانواع القمع!!
في زمن لو تشكي لربعك بكوك
ولو نخيت اللي على بالي جزع
أستويت وصرت في حالي الوك
كني الطفل (البليد) (المستمع)؟؟
وش ذبحنا غير ذولا وغير ذوك
من زمان الجاهلية والبدع
أسمحي لي كلمة(ن) لاهان فوك
العسل من ذاق طعمه ماشبع!!
بالجريمه متّهم وانت عتقوك
في تمام السابعة الا ربع
يسعد ام(ن) جابتك يسعد ابوك
اشهد انه ماخذ امك من ولع!!

حقوق النشر محفوظة لـشاعر

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2004 - 2019 - موقع الشعر