في جامعة حظي درست وتعلمت
بالغربله والهم نلت الشهاده
ياما وياما في دروسي تشيطرت
بالقاعه اللي تمتلي بالبلاده !
لنّي مع اطياف البشر ماتلونت
سقت العمر للبهذله والقراده
لاباس ياقلبٍ سكتت وتصبرت
اموت ولايشمت جناح الجراده !
ماني ضعيف ولابعمري تمسكنت
وشعري فلا يحمل حروب الإباده !
لاصرت مرضانٍ عن الناس جنبت
مابي احد يعطف علي في فواده
ان شفت درويشٍ ابد مااتريقت
والا القوي ماله لوى في عناده !
وان خاطبن رجلٍ فهيمٍ ترى صرت
مثل الطفل لامن غفى بالوساده
حالي بحالي وان عوى الوقت زلزلت
اقدام من يملك زمام القياده !
يامجتمع قلي علامك تبدلت ؟
حتى لك الله في امور العباده !
يامجتمع يامنحدر وين حدرت ؟
شوف المواطن مغترب في بلاده
تبي دليل انك خربت وتدلعت ؟
ماتشوف احمد يزهمونه حماده ؟!
وان جيت لعيار الدلع في غنج بنت
مثال / مزنه ماتبي غير غاده !
يامجتمع بعض الكباير تصاغرت
المرجله تقوى ومربى وعاده !
حتى ولو قالوا علامك تجننت
جاهل / ومتحجر / ورجعي زياده !
يامرحبا بالجاهلية اذا كنت
رجلٍ تشرّف لابتك بالرياده
لاتحسبوني مع حبيبي تزاعلت
كلام واضح مايبي له إعاده
ان كنت مخطي لاتقولون احسنت
وان كنت صايب مرحبا بالإشاده
هذا لأني بالشعر ماتكلفت
يجي مثل خطوا الختم بالشهاده !
في جامعة حظي عرفت وتعلمت
ان البليد بهالزمن في سعاده !!

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2019 - موقع الشعر - بواسطة شركة المبرمجين