سري وعاجل

سلام شاعر لانظر قدم عينه .. !
ماهوب شاعر تلفزه او دواوين .. !

شاعر ليا منّه بغاها عجينه .. !
واليا بغاها صرخةٍ في فلسطين .. !

شاعر الى منْه امتطى بالسفينه
يقطع محيط الهند في ظرف يومين.. !

اليا بغاها ( شوك ) والا ( شنينه ) .. !
واليا رسمها مثل ( ورد البساتين ) .. !

شاعر ولو طالت معاثر سنينه .. !
يبقى خفوقه عايشٍ فيه طفلين .. !

شاعر وتسكن في خفوقه مدينه .. !
وانقاض عالم مات قبل الثمانين .. !

والله لو يظهر عليكم دفينه .. !
يمكن ( يحكْمونه ) على الشعر ( عامين ) .. !

شهدٍ مصفّى جايبه في يمينه .. !
واخطر من العقرب وسمّ الثعابين .. !

ماهمني سيرة ( جميل وبُثينه ) .. !
حشى ولاهي يم غاده وتالين .. !

مااقول انا مطوّع ووافي بدينه .. !
لكن ترى وسط الحنايا براكين .. !

شفّر على الموجه وصكّ الكبينه .. !
لاواعذابي منك ياعام الالفين .. !

استغفر الله يالليال اللعينه .. !
يوم الثلاثا يسبقه يوم الاثنين .. !

ياكبر فرق الطايشه والسكينه
بين المعزّه والتفاهات .. مترين .. !

قلبي على ماجاه ربي يعينه
وانا احمد الله دامني حي للحين .. !

الله من قلبٍ لعب به حنينه
والراس شيّب في غضون الثلاثين .. !

ينكرني الواقع واصافح يمينه .. !
واحيان مااحب العتب والقوانين .. !

سرّي وعاجل بس لاتكشفينه .. !
خلي خوافي ماخفى للفطينين .. !

يالجوف ثوب العيب لاتلبسينه .. !
مادام حنا في حناياك حيين

يالجوف لاجاك القهر والغبينه
نصمل ولانسأل .. متى .. كم .. ومنين .. !

اللي يهينك يالحبيبه نهينه .. !
والصاع يايمّه بخليه صاعين

العاهر اللي فيك لطخ جبينه
والله فلا يسلم ولو راح برلين

ترى الاسد لامن غفل عن عرينه
يمكن يجيه من الثعاله بنابين

حنا عيالك والرجال الحصينه
نفعل مثل فعل العرب يوم حطين .. !

عدنان غامر في حياته ( بلينه ) ..!
وانا على شانك شربت الأمرّين .. !

راحت ترى ايام ( نحّول وزينه ) .. !
ولابقى غير الرجم للشياطين .. !

وانا ابرجم بالبيوت الرصينه
مجنون يرجم في دياره مجانين .. !

يالجوف يابنت الشرف يافطينه
تدرين فيني عايشٍ بين نارين

نار الغدر وسط السنين الحزينه
ونار الجروح اللي بقلبي ملايين

تكفين من عطفك فلا تحرمينه .. !
تكفين يمّه لاتصدين تكفين

فيني طفل تكفين لاتقتلينه
خليه يلعب مابقى له من سنين

طفلٍ على صدرك فلا تفطمينه .. !
سنّ الرضاعه لاتقولين .. عااامين .. !

ترى خبرْهم في مضارب جُهينه .. !
صادق وحق الناس طه وياسين

يالجوف احبك والمحبه متينه
لنّك عفيفة نفس واهلك وفيين

العيب الا العيب لاتركبينه
لو هو حصل قدم البشر والسلاطين .. !