لعنبو جزل القوافي...!! - خالد بن سكران

كان في بدع القصايد أبدعك بأجمل قصيده
لعنبوا جزل القصايد كان ماتبدع عشانك

الشعر يخضع لعينك والفكر أنتي بريده
والقلم في وصف ذاتك عارفٍ قدرك وشانك

والله أنك وسط قلبي وتغذّين بوريده
وأتنفّس من عروقك وأتغذى من حنانك

وأن فقدتك يوم نار الشوق ولّع بي وقيده
مايطفي لاهبه ياكود كلمة من لسانك

أنتي؟ روحي لو تروح اليوم من شانك شهيده
لعنبوا روحٍ تعيش اليوم ما جالت جنانك

ياربيع العمر يافرحة عيونٍ بك سعيده
أنتي الألماس والمرجان وش يسوي إوزانك

في جمالك صايره للحسن ياعمري عميده
ياعميدة حسن كل الكون محلا زعفرانك

كل وردة تنحي لك غصب وتغنّي نشيده
ما ألوم الورد من روعة جمالك خاف أمانك

لك بساتيني تفوح بنسمة أشواقٍ فريده
كل ماهبّت نسانيس الغلا زارت مكانك

الغلا لك بس وحدك مرتفع لك في رصيده
يوم غيرك ماعرف قدرك حبيبك فيه صانك

صدقيني ما أجامل أنتي في قلبي وحيده
صدق توني قد عرفتك بس عايش في زمانك

صدفة الأيام خلتني أحبك يا العنيده
لين صرت الفارس اللي يمتطي صهوة حصانك

© 2024 - موقع الشعر