الكفو عند الناس بالخير مذكور ,

لـ ، ، في المدح والافتخار، آخر تحديث :

المنسابة: هذه القصيده على اثررساله ومضمونها طلب وصلتني من بناخي / مشعل بن سعد البياضي وتطرقت فيها لوالده ابن عمي المرحوم باذن الله تعالى / سعد بن محمد البياضي وايضاٍ له ولاخوانه وذكرت فيها ما يحملون من الخصال الطيبه وكل ما ذكرته وعديته فيهم من مزايا حميده وصفات يحملونها صحيحه.

هاجوس شعري ما يحركه ديكور
منظر جماله ما يشده ويغريه

واهتاض يا مشعل على عدة بحور
لرسالتك والبيت يهدمه وابنيه

رغم اكتماله لاخلل به ولا كسور
استوفي شروطه واعززه واغديه

شعري وهاجس شعري بحالة نفور
من الفرح هلت مدامع قوافيه

ثم استقروعاد ماهو بمجبور
يترجم رسالتك شعر بمعانيه

يحفزه واقع بحاسيس وشعور
ما سيّق من دافع خيال ٍ يسرّيه

مضمون ما برسالتك يشرح صدور
بقلوب ِ تهلي وضماير تحييه

براق مزنه هل والدار ممطور
منه ارتوى شعبه وروضه وواديه

به رحبت بيداء وغنّت له طيور
والخاطراستقبله بالورد يرميه

هذا طلب ياابوسعد وانت مشكور
على الطلب وابشروخالك يلبيه

غالي وفي مطلبك ماني بمعذور
وشلون ابااطوفه وصعب ٍ تعدّيه

ابوسعد مشعل ظهوره كما النور
من طيب ٍ بفعله وطيب ٍ يباريه

طيب ٍمجوّد به بسلّم ٍ ودستور
ما كنه الاّ ورث ومورث ٍ ليه

من والد ٍ بفعوله البيض مشهور
كريم وبجوده قليل ٍ يوازيه

جوده سخاء ماهو بهياط ٍ ولاغرور
من جده الاول وابوه انغرس فيه

بيرقه في روس الضلاعين منشور
من كثر ما قدم لضيفه وناصيه

منزله معروف ٍ ولاهو بمهجور
ملفى ومدهال ٍ والاجواد تأتيه

ما تنطفي ناره ومجلسه معمور
اما يعشي ضيف والا يغديه

سعد محمد فقدته ما هي بزور
يفّقده منصاب ٍ لجرجه يداويه

مشرّف ٍ ربعه وناس ٍ له تزور
عاش ورحل عنا وياليت نوفيه

لوجزء من حقه ما نحصره بسطور
بكتاب من فعل ٍ فعله النكافيه

ما ورّث اموال وبساتين وقصور
ورّث فعول جزال تتعب مضاهيه

وانتم خلفتونه ولا فيكم قصور
متمسكين بنهجه وفي مباديه

انت واخوانك خلفته خلّفت نمور
والشعر فيكم يهتدي من يسويه

يلقى بكم لو كان شاعر وميسور
من الخصال النادرات وتقدّيه

لمروج منها يقطف ورود وزهور
وفعولكم حافز يقرّب هقاويه

اسند لبومتعب بِناء الساس والسور
منه استلم وانجز وشيّد مبانيه

عبدالعزيز اتفن بتطبيقه الدور
ما كنه الا في وصيه موصّيه

طبق مزاياه وبها صار دكتور
وصفات مكتسبه عليها مربيه

وسّع مجالس بيته وعاش مسرور
مشرّع ٍ بابه وضيفه معشيه

خلد بصامات ٍ وتبقى له دهور
في جوده وفي طيبه وفي حسانيه

قبله رحل والعمرفي وقت محصور
ما نقدر نربعه ولا نثنيه

ذكراه دمع ٍ من على الخد منثور
وفاته بتاريخ لا يمكن اخطيه

عشرين عام ٍ واربع سنين وشهور
مرن على فراقه ولاني بناسيه

علاقتي به صاحب وخوي له شور
ماهي بعلاقة خال رافق بناخيه

اغليه واعزه واقدره وأثور
من أي موقف لا زعل منه وارضيه

لكن عزانا بصقر يسوى له صقور
خليفته متعب عسى الرب يحميه

حفيد سعد وولد اخوكم ومخبور
شهم وسلك ممشاه وابعد مشاحيه

والنعم في ناصر وفي راس منصور
وفي محمد وفي علي اقدمه وابديه

الكل منكم رجل خيّر ومنعور
ما فيه ظرف ٍعن لزومه يخفيه

في كل مآقف نآجده وافي شبور
قرم ٍ يسد ويعطي الحق راعيه

اثني عليكم شعر ثابت وماثور
يوثق ويحفظه راوي ويرويه

في طيبكم ينعد ماهو بمحظور
طيب ومحال الوقت لوطال يمحيه

والكفو عند الناس بالخير مذكور
وينومس بفعله وصيته وطاريه


تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2020 - موقع الشعر