إخوانية بين الشاعر/عبدالعزيز محمد الحسين
والشاعر/ عبدالرحمن المجلي
أهلا هلا يامرحبا بالرسالة
اللي بعثها طيب الأصل والصيت
جاني كلامٍ مايسطر مثاله
جاني من " الوافي" وأنا ماتحريت
طيبه زكا من طيب عمه وخاله
من أسرة في المجد شادت لها بيت
راعي الكرم ماقط غاضت دلاله
ولا قط ضيفه قال انا ماتعشيت
إن فاخرت حايل بحاتم وماله
مرات " بالوافي" فخرها كما ( كميت )
سلام يارمز الوفا والمناله
وازكى التحية عد ما أنفقت وأعطيت
عبدالعزيز محمد الحسين
أبو حسين
-----
----
رد الشاعر/ عبدالرحمن المجلي
---
البارحه هاجوس شعري طراله
وانسابت الأبيات بيتٍ ورا بيت
في مدح منهو يستحق الجزاله
ضاري صميدع فالمهمات عنتيت
(أبو حسين) القرم راعي الجمالة
ما احتاجت فعوله شهاده وتثبيت
عريب جد ومن (هذيل )الشكاله
نعمٍ بهم هامات عزٍ مناعيت
تخفي يمينه ما انفقت عن شماله
يبذل لوجه الله ولا همه الصيت
يسعى بجاهه ثم يسخي حلاله
زيزوم في الفزعات ماقيل صديت
لا شال حمل الكايده ارتكاله
في موقفٍ مافيه يمكن و ياليت
اديب ..شاعر ..راقيٍ في مقاله
أدعي له المولى إلى اصبحت وامسيت
وله في مجال العلم مجدٍ بناله
قصرٍ تليدٍ شامخٍ كنه (كميت)
عز الرفيق وسعد منهو عناله
ونعم الخوي إنكان في الدرب خاويت
يابوحسين الفخر يرفع عقاله
يقول لك يا مرحبا بك وحييت
رأيك سديد ومضربٍ للعداله
بالعز والنوماس عشت وتربيت
مثلك قليل وصعب نحصي خصاله
عسى الولي يحفظك ان رحت أو جيت
وازكى الصلاة تخص طه وآله
عد الحجيج وعد من طاف بالبيت
---
---
عبدالرحمن عبدالله المجلي
كميت جبل في محافظة مرات
