@@ يا وجودي وجد من غارو عليه و لا طراله @@ - ناصر السحيمي

يا وجودي وجد من غارو عليه و لا طراله
غير عزوه تحتمي له لا سمع صوت العزاوي

و لا تذكر ما وجد له عصبةٍ تحمي حلاله
و في طرف بيته بناته و ان فزع ما هو بقاوي

مرت ايامٍ عليه و لا حصل ما جض باله
عايشٍ عيشة فقير و لا تفّكر بالمساوي

عقبها جته المصايب من سببها سل حاله
يوم جاه اللي كواه و لا لقاء طبٍ يداوي

اهجدوا الحنشل مراحه و البلا زاد اشتعاله
في صبي ما تم عمره اربع شهور(ن) و ذاوي

داسته بكره من البوش و تحطم بالسهاله
و عزتي للي نحر صدره توطته الخطاوي

و لا وعى من طاح بيته بالذي يجري قباله
الا في وجه الصباح و عقب ما قفى خلاوي

و شبت الجمره في جوفه يوم بان اللي جراله
ثم تحزّم ناويٍ باللي تسبب بالغزاوي

ثم تغانم بندقه و حزامه اللي ذا مجاله
في عزومٍ ترتكي له لا بدى وقت البلاوي

و احتمى من دون عمره و احتمى للى بقاله
لكن اللي باقيٍ له راح في غمضة مضاوي

حرمته و اربع بنات و ذا الصبي هم راس ماله
و العمر ما عاد يمدي و الفنا كالذيب عاوي

ذا وجودي من بلا صاب الحميا و الشكاله
في زمانٍ ما عرفنا علته بين الشكاوي

يوم ولد اللاش عند الناس ما يستر خماله
و المراجل تو عينه و الردي طبعه دناوي

و لا لقينا من يشل الحمل عن عمه و خاله
و لا رحم من كان حمله ماش واخلف بالهقاوي

جعل من ضيّع مسيرة شايبه يقرب زواله
كان ما جنّب طريقٍ ما مشى به غير غاوي

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلاّ نادراً.
  • للتواصل مع ادارة موقع الشعر إضغط هنا.
© 2021 - موقع الشعر