أمس العصر مريت مـن طـارف كميـت - عبدالرحمن بن عبدالله المجلي

قصيدة من الشاعر/ إبراهيم المجلي السبيعي من مملكة البحرين ورد من راعي مرات
أمس العصر مريت من طارف كميت

ديرة أبوي ودار عرنة جدودي
ديرة بني عمي هل السمت والصيت

ربعي هل الطولات زين الأسودي
ديرة مرات اللي بسناها تماريت

من عصر خالد لى زمان السعودي
فيها كرامٍ بك تهلي إلى جيت

اللي لهم مرقى المراجل صعودي
هم عزوتي لاعاسم الوقت وأبليت

عزي سنادي لى تهاوت عضودي
ربعٍ إلى من طحت قالو لي أعليت

ملفى هشاشيل الخلا والفهودي
لى جيتهم عاني من البعد وافيت

ربعٍ عن سلوم المكارم تذودي
ينصاهم المضيوم ومفارق البيت

ريفٍ إلى من زاد شح الحسودي
عزي وعوني هم إلى لذت وألجيت

لى ضامني عسر الزمان النكودي
ماقلت شيٍ في ثناهم تهقويت

إلا الوكاد اللي روته الوفودي
جدني أنا مبطي من العام ماجيت

فكري هواجيسه تشط وتعودي
تجذبني الذكرى إلى اصبحت وأمسيت

تاريخ مجدٍ سطرته الشهودي
واليوم عنّت لي الذكرى وعنيت

ركبي جداهم أستحثه بزودي
سلام يادارٍ لها فهت وأثنيت

مالعلع الجمري بروس الفنودي
إبراهيم سليمان المجلي السبيعي

راعي مرات
___

___
زان المثل في خاطري واسفهليت

وا بديت أنا شوقي وعاطر ردودي
للصاحب الي خص ربعه هل (كميت)

بأبيات جزله ماعليها نقودي
من طيب ساسه يالنشامى تقهويت

وأخذت أنا شفي.. ورَوّيت عودي
ياراعي البحرين ..ياعالي الصيت

يالي غلاكم بالضماير يزودي
قطفت من زاهر كرمكم وشميت

ريحٍ يشادي فوح مسكٍ وعودي
أنا أشهد إنك بالمراجل تماديت

فعلك.. وطيبك.. راقيٍ بك سنودي
وأنا أشهد إنك في المعالي تعليت

تدّرك بجاهك كل علمٍ يكودي
راعي ( قلالي) مرحبابك وحييت

انتا لنا يمنىً وحنا العضودي
شامخ بفعلك يافتى ماترديت

ياشوق ضافية الستر والجعودي
ياليت ربي يجمع الشمل ياليت

من قبل ماتطوى علينا اللحودي
تكفى (يا بو راشد) نبي تعمر البيت

في ديرة أعمامك.. مقر الجدودي
وإليا إجتمع شمل القرايب تهنيت

جمع الشمل يسوى جميع الوجودي
إلى ذكرت عصور اهلنا تأذيت

يشب في صدري سواة الوقودي
وقتٍ فلا والله مثله تماريت

وقت عليهم (يابن عمي) جحودي
وقتٍ يشتت جمع الأخوان تشتيت

في دُورة العيشة تعدوا الحدودي
ومن يوم ربي سخر القار والزيت

نحمد ولي العرش صارت مهودي
نعيش في الدنيا على ماتمنيت

طير السعد غرد على كل عودي
يا الله يامن فوق عرشك تعليت

إنك تديم الخير عهد السعودي
ومنك العذر كاني بقولي تماديت

لاشك ولهانٍ وباحت سدودي
ولك التحية عد من طاف بالبيت

وعد الزهر وإعداد رمل النفودي
عبدالرحمن بن عبدالله المجلي

راعي مرات

مناسبة القصيدة

الشاعر / إبراهيم سليمان المجلي السبيعي.... ( راعي البحرين) أبو راشد من أهالي محافظة مرات وظروف الحياة قديما في الغوص جعل والده يذهب إلى مملكة البحرين ويستقر هناك يتزوج ولكن مايزال الحنين إلى الوطن ومدينتهم محافظة مرات يشغل ابناءه وهذه ابيات لأبنه الأكبر الشاعر إبراهيم المجلي السبيعي
© 2023 - موقع الشعر