ورد الصدى صوتي علي - كبرياء العتيبي

السلام عليكم
البارحه والنجم يضحك بالسما ..!

اشتقت لك..
احتجت لك...

ناديت لك....
ولاسمعت احساسي

وردّ الصدى صوتي عليّ..!
البارحه فكّيت شباك السكون ادّورك

فزيت من عمق الجروح اتخيلك
حفنة دفا

تقبل وكن الكون كله (عقد)
في جيدي غفا.!

البارحه شفتك كذا..
تقبل وريح اثيابك البيضاء يسابقك ليدي

تقبل واجرّ امن السماء تاج وخمار ومكحله
وآخذ من انفاس الوله تولة عطر

واتحول لغيمه وتصير إنت المطر
اتخيلك

واركض عليك استقبلك
استنشق الريحان في ثوبك وعود الهند بشماغك واجيك

اطيح قدامك
واروح اقصّ لك كل الحكايا من بعد ليل الجفا مااجتاحني

اقصّ لك كيف الدموع وهالعيون... وٌِكيف ليلة امسي ابلا صوتك الدافي الحنون!!
اعلّمك كم مرةٍ عضّيت ناب الغبن وانته مادريت.!

البارحه جرحي نسى وناته وجا يحضنك
فيني يدسك من هنا

وسط الضلوع اللي تراقبك بخفا
البارحه ناديت ياعمري انا

وقّف هنا
وقّف على تل الجروح

ولاتروح
اجلس معي

إسأل على قلبٍ نصوح
اتفقده

قلبْ احتواك وذرّ هالعالم هناك
قلبٍ ابد مايوم مرّ وهمّلك

قلبٍ صدوق ومايعرف الزيف كيف ولايملّك
مايوم في عمره شكا رغم القسا

رغم الجفا
رغم المرار وليل سهده والعذاااب

رغم الغياااب
البارحه فكّيت شباك السكون

اتلمّسك
لاني بمووت من الجفا

والله بموووت من الجفا
وملح الغياب يطش وجهي للظما

للتيه
لعيون السراب اللي هما

البارحه
اشتقت لك

احتجت لك
ناديت لك

ولاسمعت احساسي
ورد الصدى صوتي علي

رد الصدى صوتي علي
الصدى

صوتي
علي

كبرياء
© 2024 - موقع الشعر