ليل الهوى - كبرياء العتيبي

على متن السهر حثّيت رجلي والمداين ليل
وسريت الفرجه اللي لو سراها الرَجل طاح بها

وانا بنت الغلا والتيه والزومات والتدليل
على جفني تطيح النجمة وتبقى خرايبها

تموج بعيني اسرار البنات وهمهمات الجيل
عنود ونرجسيه واعشق الدنيا واجاذبها

كفوفي لو يقولون الكفوف من الدلال تسيل
على عرش الترف سالت يديني من قوالبها

على يمة ديارك سرت والدنيا تصب الويل
وسط خدي تشوف بعينك هنيا مساحبها

ياكيف اسريك ياليل الهوا الموحش بقب الخيل
ورهيفات السيوف امن الملح ذابت مقاضبها

حبيبي ياحبيبي وش ورا أرحب وريح الهيل؟!
دخيلك هاكني وضلوعي اول ماتهب بها!

صبرت ليال من دونك ولاظني بقابي حيل
عن وسوم الزلال اللي لنا صفيت مشاربها

تخايل واذكر الله وارفع التكبير والتهليل
لفتك المزنه اللي عنك ماشحت سحايبها

تمشّى في خبوتٍ دوب مارفّع عليها السيل
تضاحك لك نفلها وانثنى يشرب مساربها

تخطى يااول العشاق بسم الله عليك وميل
على روضٍ تباطا جيّتك وابطا يحسّبها

عليك امان ربي ربّع بقربي وخل الليل
يمر وشرهة الدنيا على منهو يطالبها

وسلامتكم
© 2024 - موقع الشعر