حاجه طبيعيه - سعد الودعاني

ابشرك انا بخير ولاعلي والله خلاف
في كل يوم يطل حزن...يطل نفس الوقت عيد

لاتحسب ان اكبر همومي شعر وتركيبات قاف
اواخر احلامي بروز...اواكبر افكاري قصيد

المشكل اني بس شايف شي خافي مايشاف
شي احس اني عليه اصبحت في العالم شهيد

بين الخفيفات الثقيلة والثقيلات الخفاف
بين البعيدات القريبة والقريبات البعيد

الحق كيف يقال لاصارت نواظرنا تخاف
من كل زول...وكل شكل...وكل وجه...وكل ايد

امه...اجل مليار نفس ولااختراع ولااكتشاف؟!
والمشكل ان كل واحد منهم يقول انه سعيد

الدين...مابه دين صدق...العلم في حالة جفاف
المعرفة تكاد تعدم...الجهل حاله يزيد

حاجة طبيعية يعم الفسق ويموت العفاف
حاجة طبيعية يعم الريب...ويموت الأكيد

حاجة طبيعية يزيد الفجر وتطول العجاف
حاجة طبيعية يزيد الكفر ويطول المديد

حاجة طبيعية يطول ابليس ويزيد اختلاف
حاجة طبيعية يزيد الاختلاف يزيد كيد

الوضع شكله منتكس...الاستقامة انحراف
الشكل هذا من سبب وش قال عمر...وش قال زيد؟

اللي عبد له ادمي اخوك ياعبدالمناف
لاصار ذاله ذاه سيد...هذاك له هذاك سيد

واللي ماهوب يقدس الله غير في صحن الطواف
الظاهر ان غير التعب من عمرته مايستفيد

المسألة ماهي سعي ولابعد حالة طواف
فيها قبل..فيها بعد..وين أنت من رب العبيد

لاصرت ماتذكره ياللي نبضته تحت النحاف
مهما اقتربت من الشعائر والنسك عنه بعيد

ان كان ماتملاه ذكر يجعله من النظاف
وش فايده ومااعتلق به من شرايين ووريد

والنفس اذا ماخالفت الأهواء وشافت ماتعاف
يصير ذنبك لك قدم...وتصير له ساعي بريد

والجرف لامن صار هاري لو تمسك بالحواف
مهما تشد ايديك فيها...ايديك ماوالله تفيد

لابد من نجمع سوى مثل الطيور اللي صواف
كل يسوقه شاهد عليه من ربه عتيد

توبة...اذا لابد من حالة ندامة واعتراف
عصيان...اذا لابد راسك فيه شيطان مريد

© 2024 - موقع الشعر