حقل التجارب

لـ مضواح بن شتوي، ، في الحكمه والنصح، آخر تحديث

حقل التجارب - مضواح بن شتوي

من لايوقف معي في ساعة الشده
‏وانا معه في الشدايد متعب حالي

‏زكاة الاصحاب لا بندق ولا عده
‏ما غير ديكور مثل المحزم الخالي

انا احسب انٌه لطمه العرق من جده
واثارهم صادقين اهل الامثالي

البُر ما خلف الا التبن في كده
هذا مثل نسمعه من اول وتالي

يروح عني يدور واحدٍ قده
يسدني ماخسرته فيه من مالي

وانا ادري لو خسرت الدم ماسده
طبيعةٍ ما عشقها غير الانذالي

دام العلاقه مع الوافين ممتده
والوجه طايل وراسي دايمٍ عالي

ماهو بلازم علي اغليه واعده
مثله وشرواه يبطي ماهوب غالي

عساه يفدا رفيقٍ وافي المده
اللي لمنك زهمته جاك طوالي

يدري بسدك وعندك علم عن سده
ويضيق صدره لاشافك ضيق البالي

هذا هو اللي يودك وانت بتوده
ترتاح من خوته ياطيب الفالي

خوة رجال لها عند الزهم نده
ماهيب خوة بلوت لليلها سالي

ولاهي بخوة مصالح وقتها مده
ايام وتصير مثل المشلح البالي

يغليك وقت الرخاء ويبور في الشده
ويعاف خوتك لا جاء مزهبك خالي

ماودي اركز عمود البيت واهده
حقل التجارب كمن في وضعي الحالي

مضواح بن شتوي

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2021 - موقع الشعر