الشاعرة ماهي برجال - سحايب خير

والله ماني عن اللي قال نشاده
كتبت شعري ووصلته مع حروفه

ناديت فكري وقلت الشعر رح ناده
ولبى ندايه وصعدني على كتوفه

نادى المشاعر وجات تقول منقاده
عسفتها لين صارت غصن معسوفه

عل وعسى مع صراع الفكر وجهاده
كل يعرف العروس إن جات مزفوفه

الشاعره ماهي برجال يا ساده
يوم ان كل عليها يشهر سيوفه

الرجل مايلبس سوارات وقلاده
ولا ظنتي ينقش الحنا على كفوفه

ومن يدش باسم المره ياكثر نقاده
ياخذ على الثوب والتسريحه بروفه

يلبس نقاب ويبدل اسمه بغاده
ويرمي عقاله ويلبس عنه نفنوفه

والرجل ماظنتي ينزل عن امجاده
والمشتبه ماهو برجال بوصوفه

الله خلق والله اللي فارق عباده
ناس بصيرة عقل والبعض مكفوفه

وأنا على الصدق ياهل الزيف معتاده
ما احد كتب لي ولا بالكذب مكلوفه

شعري فرضته وجنن كل حساده
ونجم برز ماتهزه ناس ملقوفه

وترى الاشاعه لكل اللي وصل عاده
واللي يشك بسحايب حرة بجوفه

ياناس انا بنت بنت أكتب وقصاده
ومن لا اقتنع بي يطق براسه الطوفه

© 2024 - موقع الشعر