يوم الأثنين .!! - صالح بن عمار

الشوق ياالمشتاق ... خلّه لبعدين.
شطرٍ كتبته ..! للغياب وظروفه.!!

قبل ثلاث اسنين في يوم الاثنين.
هب الغياب .. وذقت منه الكلوفه.!!

غَيبه بلا توديع .... تذبح بحدين.
حد الغلا و حد الندم والحسوفه.!!

يابنت دربٍ جابك الحين هالحين.
عودي معه .! مادام عينك تشوفه.!!

لا تقولي حسيتي وجيتي تحبين.
واقول قلبي عاف واعلن عزوفه.!!

العام مرسل وين ولاجاتني وين.
غابت معك والقلب حزنه يلوفه.!!

مهما حلفتي من هنا لين برلين.
عفناك .. عفنا القلب وكثرة حلوفه.!!

وش ذكرك فينا بعد غيبة اسنين.
النفس طابت ... والمشاعر عيوفه.!!

ان كان عندك عذر هاتيه واهلين.
وان كان مابه عذر .... مابه مروفه.!!

ماعاد فيها جيم ولا عاد به سين.
انسي و زولي لا تنادي طيوفه.!!

اشوم ..!! وادوس الغلا والمحبين.
روحي على المقفين ماهي شغوفه.!!

عزيز نفس ولا بها شي تدرين.
مغبون يوم القلب .. طوّل وقوفه.!!

روحي مادام القلب قرر تروحين.
واخذي معك بيتٍ تلالا حروفه.!!

الشعره اللي بالهدب تلطم العين.
تنتف ..! وربي ماعليها حسوفه.!!

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلاّ نادراً.
  • للتواصل مع ادارة موقع الشعر إضغط هنا.
© 2021 - موقع الشعر