تبي ترجع تناديني .!! - صالح بن عمار

يقول الليل ...!! ياتويتر لفى لديارنا زوّار.
مشوا بين البيوت اللي مساها ضَيّع الجرّه.!!

الا ياليت ياتويتر ...!!! تحط لدارنا رادار.
يبيّن لي من اللي طوّلوا ... واللي خذوا فَرّه.!!

كنوزٍ تلمع بصدري كنوزٍ باسم ابن عمار.
صهرها فكر شاعر .!! قَدّم الدرّه ورى الدرّه.!!

نوادر فاخره ..! نبهر بها النقّاد والشعّار.
صياغة شاعرٍ ..... فكره حكم جوّه على برّه.!!

من الندر تنقينا وصدرك يالورق تذكار.
اجاهد ودٍ بجوفي ......... يتل القلب ويفرّه.!!

انادي للغلا.! بين الوجيه وناظري سبار.
شعورٍ يشعق بصدري عروق القلب منضرّه.!!

تعال وعانق اللهفه تعال بداخلي واختار.
ترى غيرك يموت .... ولا ملك مني ثقل ذرّه.!!

مادام اني احبك لا تصدد عني وتحتار.
يمين الله في صدري.! تخالط خيره وشرّه.!!

ومادام الصد بالنيّه توكل لا تجيب اعذار.
زرار الثوب فكيته ..! عسى تلقى من يزرّه.!!

تركتك في ظلام الصد والاقدار بالمقدار.
تقول الوقت خادمني واقول الوقت له كَرّه.!!

تقدم والعب بوقتك وعدنا باخر المضمار.
تبي ترجع تناديني لا جات الدنيا مفترّه.!!

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلاّ نادراً.
  • للتواصل مع ادارة موقع الشعر إضغط هنا.
© 2021 - موقع الشعر