ناهي الشعر

دام القريحه بالجزيل امعموره
واجب عليها ناهي الشعر تنقاه

لا قصّرت مااظمها بمعذوره
الشعر له نقاد وزنه ومعناه

لا مرت الهزله تروح مخصوره
دام الدلو حبله قصر ماجذب ماه

وعن حالة الشاعر بالابيات صوره
وكل ٍ على شفه يوجّه مطاياه

الصدر به بعض البيوت محشوره
تستجدي لساني . وللبوح ماامداه

حتى اصبحت بين الضلوع محفوره
مافيهن اللي داير الفكر ينساه

حول ٍ مضى . حوله يبا يحين دوره
ولا ادري من الاعوام وش عاد يقفاه

بس الوكاد ان البيوت مهجوره
الطير ماغرد بصوته وغناه

لو غرد بصوته . تلاحا طيوره
ويظهر مابين الناس بالملتقى ارماه

منه العزيزه بالمسير معثوره
لعلها ياوافي العرف تفداه

اخذت فيهن من زمان . المشوره
قالوا لامات الذيب مايسمع عواه

لو الرجل يخرج عن حدود طوره
مده . وكف يمينه يلوم يسراه

الهرج به زله . وللعزم خوره
والرابح اللي لامشى يوثّق خطاه

تمت ومعنى القاف . داخل سطوره
واللي يبي يتعب على العلم يلقاه