عالم الواقع

الغالي اللي بقلبي ماتناسيته
وانا ادري انه بعمره ماتناساني

من شانه القلب ماتكثر تناهيته
والنوم وقت المساء مايجفى الاعياني

جته المشاعر لو اني غبت ماجيته
ومشاعره واصله لو كان ماجاني

والقاف لا ضاق صدري . فيه غنيته
لو كان صوتي ماتنجح معه الألحاني

لكن اوسع عن اللي منه كنيته
من سبّته هام فكري سبع ودياني

ادخل بجو الشعر والواقع اخفيته
اشوي والياه مدري وين وداني

واصبحت اشوفه بعيني لو هو ببيته
ابا اتكلم واعبّر مير ما امداني

البحر حضّر من الغبه توابيته
واخذني لعالم الواقع وخلاني

يا ليته أمهل ثواني بس . ياليته
ان كان ماهو على شانه . على شاني

الكل منا زمانه عد توقيته
والأول اللي يعد . أعبر من الثاني

لكن يالغالي اللي ماتناسيته
حاولت ابصبر شوي . وشوقي اعماني