رسالة روح وشعر

جيت أدور عن حقايق تقطع الشك بيقيني
واحتضن في راحتيني حفنة تراب الحقيقة

وانثر النسرين جوهر في صفاه الياسميني
واجمع اطياف التزيّف في مِلايَتْه العتيقة

من أنا؟ من نسل شاعر كلمة الخير ف يميني
وكل شاعر بد ما يوفي حقوقه للخليقة

جيتكم في راحتي نبراس من باجي سنيني
وفي يساري لمة آمال القلوب المستضيقة

جيت تايه..جيت زاير..حر ماتفرق مديني
قاصد ابواب النشامى في متاهاتٍ غليقة

قاصد انشد عن معاني سامية..والحق دين ِ
ولازم يوفى على رغم المسافة والطريقة

ياعرب ماعادت ضلوعي اتّحمل طاعنينِ
وتاهت أسباب التشافي ف المسافات السحيقة

نرجسي..ساحة تغاريد البلابل.. ياسميني
بوحشة أطياف القبور وبحة انفاس غريقة

ليش كل زين ايتشوه..غير ما تنظره عين ِ؟
ليش كل م تظن كونك يتسع يصدمك ضيقه؟

ليش نظلم..ليش نخدع..ندعي..نوهم..نهين ِ؟
ليش في لحظة ضَعَف الانسان يطعن في رفيقه

كيف أبرثي والضياع بدم دمي محتويني
يستفزآهات شاعر عيّت همومه تطيقه

لي متى لشيطان أخرس بسمح يكتف يديني؟
لي متى تثنا عزوم الخير والواقع يعيقه؟

ونسكنك يا هالظلام وفي بقايانا دفيني
ويرحم الله نفس تعرف قدرها ياللي تليقه

نفس من روح الطفولة في براءتها تزينِ ِ
روحها ريحان تتعلل به النسمة الرقيقة

آه..محلا هالطفولة في قلوب المرهفينِ ِ
كأنك إلا تقول جوهر يذهل الناظر بريقه

فطرة الله..ما تكدرها قلوب المعتمين ِ
لكن القلوب تتكدر وتعمى..ف الحقيقة

(رقية محمد الشحي)