شعور وشعر

أنا لعينك لو عشقت الوفا نور
وأنا لقلبك لو عشقت الجفا نار

عطني صريح القول لاتلف وتدور
ولا تعذر بالزمن جار أو دار

إما تشيل الود من طور لي طور
وألا الوفا لا تذرف الدمع وان طار

الحب عندي أصله احساس وشعور
واصل الهوى عندك خواطر واشعار

وإذا بيوت الشعر في عيونك قصور
أنا بيوت الشعر في عيوني قصار

وان كان غيري غرك افبينت مكسور
أنا ترى شعري لأعلى فلك سار

قل نرجسي قل عاشق الذات مغرور
ما يلحق العاقل ملامه من اغرار

قدري بنفسي عارفه مسمع الشور
إلا من اللي يصدق القول لاشار

أنا لمن بين لي الود مقدور
يصير له عندي معزه ومقدار

وإذا استغل الطيب فيني لقى سور
بيني وبينه يمنع الشوق لاسار

يعيش هو مسرور وأعيش مسرور
لابحت أنا سره ولا بيح اسرار

من يطلب الفرقا بلا أسباب معذور
حر بحياته لو رفض يبدي اعذار

موتك من اللي بالقفا يطعنك زور
ويبثك أشواق المحبين لأزار

موتك من اللي قلبه اسود من الجور
ولياخطب في الناس وصى على الجار

ما كل بيت يسكنه ناس معمور
أو كل عقل يحدده جنس وأعمار

لا مفارق الجنة ولا مفارق الحور
لا ساهر ليلي ولا ناظري حار

غيرك يحول عيشتي نور في نور
وغيري يحول عيشتك نار في نار