بيت الزجاج

الصاحب اللي يجيني كل يومٍ مزاج
اذا عطيته وجه .. قام وعطاني قفاء

عساه نذر (ن) على الطيّب وطلق الحجاج
اللي ليا قال قول (ن) يحتميه ووفاء

ولا الردي في عيوني كنه سلعة حراج
مايرتفع سوقها من عقب ماقد هفاء

انساه وابحث لنفسي عن مساره خراج
وش عاد بعد التكبر .. كون زود الجفاء

البعد عن ديرتة ... للنفس عز وعلاج
لو امسي جويع . وامشي مع طريق الحفاء

منه اشرب الماء القراح وكنه ملح ٍ أوجاج
ياعنك ماعاد بعد اليوم سر ٍ خفاء

كثر المجامل يقوي روس صقع الدجاج
ياللي تحسب الحقيقة نورها قد طفاء

أثرّ المعزة قديم .. ومقتفية العجاج
ومن دونه الجو مع سود اليالي .. صفاء

ومن كان بيتة على الدنيا بني من زجاج
لايحذف الناس ويدور مكان (ن) دفاء