القلب لوح من الزجاج

لـ عواد الهران، ، في غير مُحدد، آخر تحديث

القلب لوح من الزجاج - عواد الهران

فكري وعقلي بكل مافات درته
ومن شاف بعين الحب للعيب مايشوف
 
قلبي يعاتبني على شيء جزته
يقول دربي بالهوى درب ملقوف
 
وايظاً يعاتبني بشياً جهلته
واليوم فات الفوت بحساب وكشوف
 
يوم افتكر ماظن شيئاً خسرته
غير التعب وملاحقة قلب مجروف
 
ياصاحبي يومن حبك قبلته
ظنيت قلبي معك بالحب منصوف
 
ناديت وصوتي رد لي ماسمعته
قلنا غدي حدك على ذاك مصدوف
 
عقبه غدرت بحقنا واستبحته
حطمت من يعمل معك كل معروف
 
والخاتمه بيديك حبك قبرته
واسمك بدتيا عالمي صار محذوف
 
حتى الامل يازين منك قطعته
والحب ماهو بس عليك موقوف
 
جاني خطابك عقب مافات وقته
متعذراً بالقول اسف على حروف
 
قريت باقي الخط وقصدك عرفته
وشلون انسى كل ماصار مالوف
 
مشكور عالمكتوب وشعراً كتبته
اتعبت نفسك ليه بوراق وزروف
 
وش السبب ترسل على من طعنته
تعيد ذكرى لاجلها صرت موصوف
 
غالطت نفسك في بعض هرج قلته
يومن تقول اللي حدث حكم وظروف
 
حيث الحقبقه ..والحقيقه دفنته
فالحق واضح دايماً ثم مكشوف
 
كانه نظاماً من خيالك نسجته
مرفوض من مبداه وابقه على رفوف
 
والا الندم حداك يومنك بقته
صحى ضميرك من عمايلك مكسوف
 
فاللي مضى ماضي لو انك طلبته
مايرتجى من مات بالقبر ملفوف
 
والقلب لوح من الزجاج ان كسرته
مايرتجع ختم الاصل صار متلوف
 
ماعاتبك في مسلكاً قد تهجته
لكن ذكرى: والتعب دوم مخلوف
 
عواد الهران
© 2024 - موقع الشعر