كسر الزجاج

اشعلت في صدر الليالي من صفا فكري سراج
عشان يلقون القصيد المعتبر طرّاشته

وانا أحمد الله ما تضيق إلا يجي فيها انفراج
والنفس تروي ما حصل في وقتها اللي عاشته

والبارحة مرّيت بيته وأوحي بصدري خلاج
والعشق مبطي هازمٍ قومه وكاسر باشته

ما قد دخلت بوسط شيء إلا وانا اعرف الخراج
والوقت ما يصفي ولازم يعمل انبراشته

يالله دخيلك وانكسر قلبي مثل كسر الزجاج
وانا اتصبّر ما بيدّي غير كسبٍ حاشته

ولا عاد به خوّة ما دام إن الخوي مثل الهماج
من أي كلمة يلتمس لو العرب ما ناشته

أحدٍ وجوده كالمرض وأحدٍ وجوده كالعلاج
وأحدٍ ما غير يزيّن شماغه حسب دشداشته

وأميل للعزلة ولا لي بالمخاليق احتياج
والعظم عفته يوم شفت إنّه كثر عرّاشته

من يوم شفت الذيب ضيّع صيدته وسط العجاج
صدّقت من يبكي على فقدانه لفراشته

دنيا عجيبة والبحر لا احدٍ يلومه يوم هاج
ما دام صار الطيب يشكي والسبب نوّاشته

واشعلت في صدر الليالي من صفا فكري سراج
عشان يلقون القصيد المعتبر طرّاشته