ما بين نارين

ما بين نارين
بقلم
آمال محمود كحيل
 
 
أنا وعقلي ما بين نارين
وقلبي ماهوش مأَيِّدني
وفكري احتار ما بين دربين
ومين للسكَّة يرشدني ؟!
كما العصفور بدون جِناحين
ومين يقدر يهدهِدني ؟!
يشيل عن كتفي حِمل سنين
وكل الكون معَاندني ؟!!
 
 
لَا جايَّة الريح حسب طوعي
ولَا فيه جذع يسنِدني
وحابسة الحسرة في ضلوعي
ولو هاشكي .. ما هايفيدني
ومين هايْهَدِّي من رُوعي
وعن أحزاني يبعدني ؟!!
ماليش غير قهري ودموعي
... ورحمةْ ربِّي تنجِدني
 
نسَجْت الرؤيا تُوب وَيَّاه
وقلت دي سَبعة ، وتعَدِّي
وكان عشمي في يوم ألقاه
سَنَد ليَّه ،، وكَان وِدِّي
يداوي جروحي لو اقول آه
ويمسح دمعي فوق خدي
نَسَف حلمي اللي باستناه
ولاجْله عافِرت ليل سهدي
 
قدر مكتوب على جبيني
وهاهرَب فين مفيش فايدة
يا صَبر ازاي تِعَزِّيني ؟َ!
دي جوَّه ضلوعي نار قايدة
وهاتي يا دنيا ، واديني
هُموم بالكُوم تِنسِّيني
غباء قلبي اللي ضيَّعني
في لحظة مِ الزمن شاردة