داع ٍ عــلــيّــه والــــــدي بـالـحـريـمــه - راجح بن مشبب المقاطي

ماني بهتّاش ٍ بليّا عزيمه
ولاني لمن لايحمل اللوم لوّام

ولاني بخبل ٍ والم ٍ للوليمه
يجي لها لو كان ماجاه عزّام

داع ٍ عليّه والدي بالحريمه
من مثل هاذي في غطاليس الاظلام

وانا ليا شفت المراعى الوخيمه
عن مرتع ٍ فيها يجى النفس لطّام

أنزع واشوم ولي معزّه وشيمه
شيمة عرب تلجم هوى النفس بلجام

ماتقبل الهزلات نفس ٍ كريمه
ولايرتضي بالهون من للعلا شام

مايرتضي بالهون كود البهيمه
والا الرجال الها مواجيب واحكام

وان كان ماعزّيت نفس ٍ حشيمه
ياعنك ماعزّت على باقى الآنام

من صدّ عنّي قلت بعدك غنيمه
ماوالله اصوّت لطير ٍ ليا حام

ولاوالله اضحك للوجيه الكظيمه
اللي تقابلني بكره وتجهّام

أعقد حجاجي والدعاوي مقيمه
واقابل العابس عبوس ٍ وجزّام

مااعزّ من يرضى عليّ الهضيمه
ولاهوب طبع ٍ لي محاباة الاصنام

ربع العوافي ناقلين النميمه
هزّالة الطيّب ضعيفين الاحلام

بالحكي واحدهم يسدّ الخريمه
وليابحثت اقصاه ولياه دمّام

ولاارجى الفواكه من غصون الهشيمه
ولاني باسمّي غير حطّام حطّام

وانا ليا شفت الضمايا محيمه
ماارجي روى عدّ ٍ تحاثيه الاسوام

ولاني بارجّى الغيث من كل غِيمه
ماارجي ياكود اللي بالاسرار علاّم

ربّ الفلق محيى العظام الرميمه
محيى البقاع الممحله مذرى الانسام

© 2024 - موقع الشعر