صداقة

الوقت يكشف كل زيف ولا يدوم الا ثمين
والارض شكلٍ دايري ماهيب مثل المسطرة

يبقى الاصيل بمعدنَه مهما تغيّبه السنين
مثل المطر لو غاب مهما غاب كلّ ً يذكره

والتجربة تغني عن التدريس والعلم الحصين
كم حكمةٍ من شيخ يفداها القلم معْ دفتره

وصاحبَك ماهوب ذاك اللي يورّدك المعين
صاحبْك ذاك اللي يصفّي مشربك من معكره

(والخير ماتعدم عواقب مدته ) لو بعد حين
بشرط تنسى كثرته وان قلّ لاتستحقره

والشعر يقصر دون طولات الرجال الغانمين
لو حبره الدم وفؤادي ياقصيدي محبره

هلا هلا بالسيف ابوحدين قطّاع الوتين
اليا حمي ضرب الوطيس وصار للموت اثمره

اخوي (ابوراكان) راعي الفعل والقول المبين
فالحرب قادر ماعفا فالسلم عفو ومقدره

كريم لو زاره طفِل يذبح له الكبش السمين
جزّام وظروف الحياة الفانية ماتقهره

صادقته..ولله~ انا ضمن العباد الشاكرين
يومي عرفت (احمد) وجابه في مكاني واظهره

صداقة الطيّب شرف ياصاحب العقل المتين
عضّض عليها بالنواجذ واحمد الله واشكره