بكيت يا حامد

بكيت ( ياحامد ) ودمعي تحداني
صارعني الدمع حتى جرّح اجفاني

عيني تهلّ الدموع الحُمْر وتنادي :
( إلى جنان السما ياسيّد اخواني)

اختك قتلها الحزِن والفقد من بعدك
لكنْ عزاها الشرف ياحامي اوطاني

قدّمت راسك لسهم الموت ياغالي
وانت الشجاع الأبيْ،، ياطير حوراني

على حدود الوطن نلت الشرف كله
بكى سلاحك بعد موتك وعزّاني

صحيح ياخوي مات النور من بعدك
صحيح موتك هزم روحي وبكّاني

لكنّك انت العريس اللي نزغرد له
شهيد واسمك يشرّف طول الازماني

لبّستني ياعضيدي تاج يزهى بي
فعلك على قمة الأمجاد ودّاني

رحلت عن دارنا لكنّك ابتبقى :
فخر العوامر وفخر اهلي وجدّاني

ودعتك الله . محال انساك ياحامد
إذا نسيتك عسى الافراح تنساني !