حبك توفى - خلف بن مرزوق العازمي

اخذي شعور مولف الشعر تأليف
الشاعر اللي ماأتعب الشعر فِكره

والشعر كايد مثل عال المشاريف
والحر من يبني بعاليه وكره

الحب (كلمة) والوصل (ال) تعريف
واليا انقطع مشاعر الحب نكرة

مشاعر الامس اكتشفت انها زيف
والامس درس ويحذر القلب بكرة

حبك توفى مالحقته تحاسيف
ياكود شيٍ حان لي وقت ذكره

هي حاجةٍ وحدة اذا قلت ياحيف
انه شعور الحب للقلب بِكره

ياغاوية مالك علية معاريف
ولا لك شعورٍ يلزم اليوم شكره

واللي سقيتيه العنا صار له كيف
سهلٍ عليه اليا بغى الحين حكره

استخدم الاسلوب واعلمك كيف؟
ان الجفا يقتل وللموت سكرة

لكن انا ماصيد من قلبه ضعيف
ولاني بمن يصطاد بمياه عكرة

لي مبدأٍ ثابت ومافيه تحريف
يمكن انا ماأعشق ولاكن مااكره

روحي وبلقى لو ادوّر مواليف
قلبي سِأم من لعب قلبك ومكره

© 2024 - موقع الشعر