أمجد توفى شب مكْمل شبابه - محمد البياضي

بين الضلوع اوحي قنيب الذيابه
لاقامت تجر العوى جوع وسعار

ماكني إلآ في غراميل غابه
وانا بوسط البيت مارحت مشوار

وماجابت الدنيا من الهم جابه
خبر وكدر خاطري شب بي نار

وفاة ابن عم وعزيز ٍجنابه
له عندنا حشمه وشيمه ومقدار

ماهو ثمن مقدار عزوه ولابه
تقدير له لنه من الربع الاخيار

ولنه على الطيب يوجه ركابه
ولنه يميز فالمماشي ويختار

ولنه يفرق فالخطا عن صوابه
ولنه يعز الضيف ويقدر الجار

وما غير درب أهل المراجل مشى به
دايم يمين الدرب ما يمشي يسار

هذا مهو من شان حنى قرابه
ولا من اجله ضلع كنه جبل شار

هذا من اجله رجل كله صلابه
وفعوله تشرف عظيمات وكثار

واهمها نهج النبي والصحابه
نهجه وحب الوالدين وبهم بار

وان قلتها مافي كلامي غرابه
هذي فعوله يابعيدين الانظار

بالعون ما كل الاوادم تشابه
واحد براس الضلع والثاني بغار

واباقولها وماقولهابالنيابه
ويقولها من يعرف الحق ويغار

والليّ يعرفه زين ما طق نابه
عن كلمة ٍتنفعه لاصار ماصار

امجد توفى شب مكْمل شبابه
ماتم عمره جيل وعياله صغار

بمر الذي نزل علينا كتابه
هوالذي حدد لنا أجآل واعمار

ووالله قبره ما يشيد ترابه
لو جات له من غير علام الأسرار

ولو مات ينزف يا محمد صوابه
والله يابو فواز ناخذ له الثار

لو خصمنا دونه حصون ورقابه
ناصله وان عدنا على وجيهنا عار

مانرجع الا حاسمين الطلابه
ومن دون راس الخصم ما نقبل اعذار

وقفة بني عمك وربعك مهابه
ليا احتزمنا دونه صغار وكبار

من مرجله ماهو تجمهر عصابه
عروق ربعك دمها دايم ِحار

مير المنيه لفته في ثيابه
في يومه اللي كاتبه ربنا البار

نعرف حضوره يختلف عن غيابه
ونفقده لنا بحاجته ليل ونهار

انته وانا ومن منه جته الاصابه
وباقي اخوانك والاهل داخل الدار

واولاده الليّ سيفهم هو نصابه
اب وذرى فالوقت عن كل معصار

حتى الذي لساع ما قال بابه
يفقده لو ماله معه اي تذكار

لكن عوضهم عنه فيكم ولابه
ذره شكوك انتم لهم عز وستار

والدار دامه حي تاقف اطنابه
يحيون ذكرى من لهم رمز وشعار

هذا عزانا البيت ما انصك بابه
دامه مشرع تنبعث منه الانوار

طلبت من يرسل صدوق السحابه
ويلوح فيها البرق وتهل الامطار

يرحمه من رحمته تسبق عذابه
رحيم لذنوب المخاليق غفار

مناسبة القصيدة

انتقل الى رحمة الله تعالى باذنه الرائد الدكتور/ امجد بن محمود العلي ، احد منسوبي مستشفى العسكري في منطقه تبوك وهو أخ لسفير خادم الحرمين الشريفين ، السفير/ محمد بن محمود العلي وهما من ابناء عمومتي ورثيته بهذه القصيده وموجه للسفير / محمد بن محمود العلي ( أبو فواز ) واخوانه .
© 2024 - موقع الشعر