صحيح ملقوفي!! :

بيني وبينك ، صار
ذا اليوم..لي قصه

لعبت على ما قال:
في كيف كيوفي!

متعودٍ ، ظفري
بأسناني أقصه

لاصار مشعوفٍ
أو صار مسعوفي

فوق وتحت كانت
أسناني مرتصه

وتقص مثل الموس
ولا لها وصوفي

واليوم فيها السوس
في غفلة قصه

إلين بعضه صار
مع بعض مشطوفي

أعضض الأظفار
وأعود وأمصَّه

وأنا على الحاسوب
بالحيل ما أشوفي

أقول : واويلا اه
شوفي لي..يا (حصَّه)

وتقول : واعيبااااه !!
ما تقدِّر ظروفي!!

حسيت كني صرت
خلاص ما اخصه

يا شينها تقهر
بألفاظ وحروفي

تقول : شف لك شيء
ثرماتها لصه

وتقول : قل (خلاص)!
والقصد ملفوفي

وتعاود النظرات
بصه وراء بصه

مع شامت الضحكات
الله ، يا (توفي) !!

مشغولةٍ ب(الواتس)
تاخذ لها حصه

مع ال (جالاكسي توو)
عليها ، يا خوفي

لو وقتها معاي
(الواتس) أخذ نصه

وش عاد أبي منها ؟!
صحيح ملقوفي!!