صحيح اني غفلت

صحيح انّي غفلت وكنت ماحسب للامور حساب
لكنّي ناوي انهض نهضةٍ ماعقبها غفله

أنا اللي كنت اجامل واتحمّل لين ظنّي خاب
وانا اللي يوم ظنّي خاب اببدا شنّة الحمله

وانا استاذ اللغه والنحو والتشكيل والاعراب
يوم ان اكثر عباد الله مايعرف يعرب الجمله

وانا دكتور في علم الحوادث تتبع الاسباب
وباحث في مجال الفرق بين الجمع والعزله

أعرف الناصح الصادق واعرف المادح الكذّاب
صدوق الفعل اصدّقله وراع الكذب اكذّبله

وانا جرّبت غلطات القريب وغلطة الاجناب
لقيت ان القريب اشدّ شرّ وغلطته خبله

ولاني ملحق الدنيا ملام ولاعليها عتاب
ملامي يوم الوم الوم رجلٍ ضيّع القبله

يصلّي عابد الدنيا وقلبه عن صلاته غاب
ولو حاولت اعدّل سيرته ماهي بمنعدله