ماهو صحيح كل متوقع آت - مشعل الضوي العنزي

تجاربي مع المحبه بروفات
قبل تصير انفاس صدري تناهيت

ازين مشاوير الغرام البدايات
و تفقد ملامح زينها لا تماديت

يا ليتها تسليمه بلا تلفات
مار البلا جيت و قدعت و تقهويت

اقول مالي ذنب بالحزن مرات
و مرات اقول انّي على نفسي اخطيت

اخترتك انت و كان بيدي خيارات
و من يوم صار الراي بيديك ! صديت

قلبٍ على كفوف الغلا و المدارات
من لوحّت كفك على كف عفريت

ما تمسح اثار الدموع ، ابتسامات
ياما عن دموعي بضحكي تواريت

اصد و انثر عبرة الضيق بسكات
وليا خذتني لهفة الشوق غنيت

ياليل خبرني عن امر المعاناة
و امر شارعكم و اسلم على البيت

على العموم انا انتظر صدمه و جات
ياليتها ما جات منك انت ياليت !

مرّت بعدك ظروف ووجيه و اصوات
و لا قدرت انساك و لا تناسيت

لو تاخذك عني طوال المسافات
موجود بزجاجة عطر و بشطر بيت

ابنتظر متى آخر الانتظارات
و متى يتوب الحي ما يرجي الميت

ما هو صحيح ان كل متوقعٍ آت
يا ما توقعتك تجي ! و انت ما جيت

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2021 - موقع الشعر