زارع و خرّاف ...!

مالي ومال اهل القلوب المريضه.
مادامني طيب.! ترى مابه اخلاف.

الرجل يكشف .. قوته كبح غيظه.
ان ماملكها صار عرضه للاهداف.

ايشبه الهافي ....... بكلمه بغيضه.
وتجره الزله ... على كل مشراف.

لو كان طيبه بالفيافي العريضه.
تابس يدينه .! من كفوفه للاكتاف.

الرجل له ثقله .... وعينه عريضه.
تقرابها الظاهر ... وتقرابها الخاف.

ناس ٍ تصلي النافله ... والفريضه.
في وجه تاركها ... تبين للاعراف.

اطلق شنب ماعاد تلمح وميضه.
كثر الخطآ بالوقت ماعاد ينشاف.

دام الردى بالناس .. يكثر قريضه.
طاح العتب مابين زارع وخراف.

الصدر لو كَنّ الحسد والبغيضه.
العين ...! فيها للفهيمين مغراف.

بحر ٍ تلاطم .... بالمحاني مغيضه.
أختار بين أمواجه انداد واحلاف.

أقدر على كيفي .. اوجه مفيضه.
واقدر اخلي كل الامواج مصياف.

تبقى الصدور الحاقده والمريضه.
عريانة النيه ... لها الوقت كشاف.

قلته وفكري حر شدك نهيضه.
صيده سمين ولا يحلاّ بالاوصاف.