بعطيك نبذه ...!

ياصاحبي عذب الشعر في سنامه.
طِيبه على شارب كريمين وزحول.

راوي.! مادام ان الحقيقه حزامه.
روحه مع الايام بالناس موصول.

بعطيك نبذه ..! والحقيقه سلامه.
في بطن قافي شي بَين ومجهول.

المجلس اللي في مروره ملامه.
لا تقربه لو يمتلي عرض ٍ وطول.

ابعد مدارك عن حدوده مادامه.
من جاه يصبح بالمناقيد مكحول.

والمجلس اللي دوروا به حرامه.
أسهج مزاره صد مافيه محصول.

والصاحب اللي قل فيك اهتمامه.
قدّر له العِشره ولا تْدور احلول.

وان زل ثولث للخطآ واحتدامه.
بالرابعه وجّه له الحرف مسلول.

والرجل بالمجلس .. يدلك كلامه.
من أي معدن للرياجيل مصقول.

رجل ٍ كلامه مثل وبل الغمامه.
تثمر سواليفه له الصدق مرسول.

ورجل ٍ تهبد بالسوالف مقامه.
يسقط من عيون الرياجيل بالقول.

ورجل ٍ يقلل للكبير احترامه.
قلة أدب والسر مفهوم محلول.

ورجل ٍ سكوته بالمجالس شهامه.
لو ثار شب النار في كل معلول.

ورجل ٍ من هروجه تفكك نظامه.
مره ضليع القول مرات مبدول.

يعني ...! على ماقيل مثل النعامه.
متهبد ٍ من غير قوه ولا حول.

ورجل ٍ يثرثر فوق راسه علامه.
مكروه ماهو بالمداخيل مقبول.

ورجل ٍ ذميم وممتلي بالنمامه.
المصلح الله باقي الهرج منقول.

ورجل ٍ هروجه تعتلي كل هامه.
اعلومه كْبار ٍ ولا فيه مدلول.

الوقت بَيّن لي كفوف الرخامه.
من تجربه بانت مباديل وزحول.

ياصاحبي تم الشعر في ختامه.
ليه الحقيقه تزعل قلوب وعقول.؟