جات وضحً

جات وضحن ماعلى ارقابها غير العمود
كنّها غيمة مطر فالصباح مغيّمه

حولت للعرض قدام الأمه و الحشود
من روايع زينها للعقول مهيّمه

الوجيه الظافيه و الغوارب و الخدود
واسنمتها فاهقه للورى و متيّمه

وغير كبر جرومها والمناحر و العضود
المهادل مسبله و الاذان منيَمه

لازعجت درهام سوات طابور الجنود
كنّها على شداد الرحول مريّمه

ماتقول الا لكازز حدى ابناء ال السعود
لامشاء امن العاصمه واتجه ل مخيّمه

نقوةً مقنيةً من على عصر الجدود
اترك اللي من شبوك الحراج مليّمه

دونها غازي وابن غازي ابكل الجهود
فعلهم معروف يوم الكبود محيّمه

ياسعد قدام والعود في عين الحسود
فالصداره من جميع اللجان مقيّمه

ولا هو بس بوصفها داخل المحفل تزود
شيمة اهلها اجعلتها تصير مشيّمه

ماعليها خوف من زينها ترقا سنود
الزعيمه قدمها للبكار مضيّمه