قصيده على لسان رجل مسن

لـ محمد البياضي، ، في غير مصنف، آخر تحديث

قصيده على لسان رجل مسن - محمد البياضي

حسيت كني من على الارض مقطوع
في دار مالي به عمام وخوالي
ماهو بخلاء دار ٍ به شعاب وضلوع
به ناس من حولي يمين وشمالي
به خدمة ٍ ما شفت شكل ٍ لها ونوع
من مشرفين وكل ٍ وله مجالي
متهيئين ولا يقولون ممنوع
لليّ يجيهم به خرف او هبالي
وانا وصلته غصب مرغم ومتبوع
ماهو برضاي مكتف ٍ بالحبالي
بيدين من ما فيه رحمه ومنفوع
واخوانه الليّ جبتهم باالحلالي
ولا بعد من شدة الضرب مصروع
بكفوفهم وعصيهم والعقالي
بسباب صوتي حيل ماهو بمسموع
والشوف قل وصاب جسمي هزالي
والسكري والضغط وآلام ووجوع
والكسترول يزود والعظم بالي
بحكم سني ما تقمصت مصنوع
والحي ما بين الهرم والزوالي
اليوم لي عامين فاالدار واسبوع
ما زارني لو واحد ٍ من عيالي
انا ادري ان بعض الضنا مابه نفوع
لكن بعضهم وين ويشوف حالي
الليل ما انامه على الكف والكوع
وآقول وين الليّ غليته وغالي
يا حيف يا عيالي غدى الفكر منزوع
غبتوا وكني فاالعصور الخوالي
ما ضقت من مأوى ولا ماء ولا جوع
ولا حدني وقتي وضيم الرجالي
لاكن حب الابن فاالقلب مزروع
حب ٍ غريزي من عزيز الجلالي
بوجودكم كني بشجره لها فروع
القى بها وقت الهجير الظلالي
وآعيش تال العمر والراس مرفوع
وافخر بكم واعتز وانتم قبالي
مصيبتي عاجز وواهن ومفجوع
من الكبر وايضا من الليّ جرالي
وتهون لو اقدر تعكز بمركوع
والاّ شبابي باقي ٍ به توالي
وآقول روحو روحة ٍ ما بها رجوع
روحه بلا رجعه لو اسكن لحالي
ما احتاجكم لونه من الماء بقرطوع
وعيب ٍ عليّ ان كان عدت بمقالي
لكن حط بي الهرم كل مرفوع
وزودتو همي هم كبر الجبالي
وانا رضي فالوالدين ولهم طوع
ووفيت كل حقوقهم باالكمالي
وياما طلبت الرب بركوع وسجود
انه يوفقكم لزين المنالي
ياابناي ما قصرت معكم بموضوع
ومن اجل راحتكم سهرت الليالي
عانيت وتعذبت بنزول وطلوع
تعبت حتى تحول المر حالي
وبناء بنيته صار به شرخ وصدوع
وانا ما قمته فوق جرف ٍ هيالي
وان قلت شق البشت ما هو بمرقوع
يا عيال من منكم يجاوب سؤالي
علمتكم ان الجزاء نسخ مطبوع
من العمل ميرا حذرون التوالي
عيالكم باالمثل بقفال وشموع
يقفلون بيوتهم لا محالي
بوجيهكم وعيونكم تذرف دموع
ما يرحموكم كيف وآهملالي
يذكروكم بي وخيّركم يروع
لا قالوا وين العود الاب المثالي
في وين قدوتكم وهو حي مقروع
عن دوركم والكل داله وسالي
لو كل منكم يملك الفين مشروع
ما يقبلون املاك منكم ومالي
هذا جزاء للحي منكم ومدفوع
من مات بجهنم وتصلاه صالي
حسابكم فاالنار مثني ومربوع
يوم الصحف تنشر نهار الهوالي
وافرح بكم يوم الحشر والملاجموع
بمرالذي والي على كل والي
© 2024 - موقع الشعر