على لسان ام سجين. - محمد البياضي

في عودتك فرحت قلوب الملايين
بيض النوايا والنفوس الامينة

ابو الفقارى والضعاف المساكين
سلطان خير وكم لنا ناطرينه

وانا فرحت وفرحتي بين ضلعين
شاركت لو بعض الاحاسيس شينة

اذرف على خدي من الدمع لونين
دمع الفرح في رجعتك والغبينة

بالخص يوم اطلق سراح المساجين
شيخ الملوك الشهم سلمت يمينه

الحر ابو متعب زبون المخلين
ربي على كل المواقف يعينه

ليه ولد مسجون من قبل عامين
في سجن بدر اللي بقرب المدينة

به غررو زمرة طغاة وشياطين
لما وقع بشباكهم كالرهينة

ومن ثم طاح وطبق الشرع والدين
حكمه وهذا ماكسب من يدينه

عقب وراه اسره من ام وراعين
وابوه عود وقاضيات سنينه

عود عمى والعمر من فوق سبعين
ويجرها ونات ويقول وينه

انا وابوه كبار سن ومسنين
واصبح سجين البيت وانا سجينة

ياملوكنا يا اسيادنا يالسلاطين
ردو الفرح لهل القلوب الحزينة

قراركم يرجع لنا قرة العين
من قبل لاياتي حدانا يقينه

© 2024 - موقع الشعر