لايخدعك صوت العتب

زد في غيابك دون سمعٍ وطاعه
لايخدعك صوت العتب والمشاريه

كل مابطيت ازداد قلبي مناعه
زودن على خيبة ظنونك بماضيه

وانا .. على حطة يدين القناعه
(مرخص ضميره يرخص الله مباديه)

ماعاد ابقبل في رجوعك شفاعه
ولاعاد ابستقبل من الشوق طاريه

قفرا مشاعر .. والحنايا ( مجاعه )
أخْيَر من احساسٍ مباديّ تفديه

ماوالله انزل من عيون الشجاعه
لعيون نبضٍ (جرة الحبر) تمحيه

قدر الأهل .. وسلوم ربع وجماعه
مااهزها والحب تطوى مساعيه

أما على وضح النقا باندفاعه
والا السلامه .. واحشره في مخابيه !!