العتب

لـ ريم _قطر، ، في غير مُحدد

العتب - ريم _قطر

حبيبي والعتب اكبر من اللي تحتويه سطور
واصغر حيل من شيٍ جمع ما بينك وبيني

حبيبي والغلا كلمه ربت في خاطرٍ مكسور
ظلمها الوقت وأسرارٍ غزت أقصى شراييني

حبيبي والعنا جرحٍ يصاحب حظي المعثور
ذبحني لعنبو حظ تجاوز قبضه يديني

ظلمني واعترف والله ظلمني واقعي معذور
بعمره ماشعر بالجرح.. مره؟؟ بس سكيني

تسابق كل من حولي بجرح الخافق المقهور
امانه هو بقى باقي عليه ولا بكت عيني؟؟

حبيبي مامضى يكفي واظنك لو تلف تدور
بعمرك ماتحس شلون جرحك كيف مدميني

وهو باب انفتح مابين؟!! عاشق يا هوى مغرور
وبين اللي رخص عمره فداك وقال يكفيني

فرح في حفظ خالقنا عسا ذنب الهوى مغفور
وتأكد ما بقى بعدك حنين وشوق يغريني

© 2024 - موقع الشعر