تبين الشمس

يفيق اللّي شرب خمره ويصحي اللّي تعاطى سم
وانا طالت بي المدّه غريق ابحبّكم ما فقْت

وانا باقي على عهد(ن) مضى ما بيننا قد تم
وببْقى ما حييت ولو على افراقك انا ما طقْت

وانا راضي بحكم الله وش اللّي لجْلنا يحكم
وعدْل الرب ما يخيّب رجا راجي يَحَسْب الوقت

مكانك ما قعد به ناس ولو زادو بكيف وكم
نذر ماقول لابن آدم سواكم ياعشيري لقْت

وعد ما خصّ باللّقيا ولا قولت حبيبي سم
لغير اللّي شلع قلبي ولاحْلى من حنانه ذقْت

مادام اسمك وسط قلبي ويمشي مع عروق الدم
حشا منْساك يالغالي ولو قالو لك انّي رقْت

أنا سلّمتك اقليبي رهينه عندك وقل تم
تحافظ ياجِعِل مابْكيك ولوهي من قبيل اشْفقْت

تعال ارحم اقليب اللي غدا من بعدكم في غم
أجاوب نايح الورقا وجمْر الدّمع لجْلك سقْت

يناورني رغوب(ن) بي وانا مانيب ناقص هم
ولا يدري بأن أوراق غيرك يالغضي أحرقْت

تبين الشمس وماتْغيب النجوم اووجهها يظلم
وماتْلام النجوم ان غابت انواره الى أشرقْت