يساومني على قلبي

هلا يابارق(ن) ناضي ألا حيّه بلا الميعاد
وانا صبري تعدّى من زمان(ن) مرقبات احدود

أهلّي به وهو مجنّد طوابير(ن) تحمل اعتاد
لنسف الحب وهو يعلم بأنّه باري(ن) للعود

عصي(ن) ماعرف درب السموحه صابني بجهاد
يراوغ روغة الثعلب بدربي فعله المشهود

اليامن جيت أنا بسلى يعرّّض لي بقولة جادّ
وانا عندي الخبر كلّه واعرف انّه خطاة ارعود

يساومني على قلبي وانا قلبي معه منقاد
رقيت لسلّمه لاعلاه وفك لحبله المشدود

يمشّيني سماح أمره وانا ممشي بغير جهاد
ومن غيره على دربه لو ابطى ماقبلت القود

وانا مصخي بنفسي كود للّي شباكها صيّاد
أسجّ الرّجل ومشي عجل واقع بالشبك مصيود

كلاليب الغلا تجذب قليب المهتوي بركاد
ولو هي من جهة غيره من السجّيل اتى منضود

انا اللي بقسمتي راضي اعيش معلّق بمنطاد
ولو حاول يحوّلني عن المنطاد حيل احيود

انا اللي حاجتي له كل يوم(ن) بالرّضا تزداد
وانا في داخلي يطبخ لحم هرش(ن) يبي للزّود

انا اللّي ياسمعت اسمه تجيني شهوة(ن)للزاد
وانا اللّي يوم يطرونه يزيد النّبض عقب اركود

وانا اللّي نومي الغفوه هنّي ياللّي تبيع سهاد
وانا اللّي قومتي جفوه كما الراهب براس الطود

أحس انّي به موكّل انافح من سعى بضهاد
وعليه الغيره بقلبي تعدى الجود من ماجود

انا في سلوتي مجهد أفكّربقامة المقعاد
وانا اللّي بشغلي الملهي يباريني رماح(ن)سود

فلق صبح(ن)غسق ليل(ن)ضمور(ن)للوسط جرّاد
تبدد في محاسنها مفاتن مترفات الخود

أبدعي بسجدتي يجعل الهي جنّته ميعاد
وهي بدنياي لي جنّه صفا لبّه وحمر اخدود

وانا اللّي مطرق(ن) راسي عن مناظر بنات الضاد
ولو جابو بنات الترك مع كشمير ماهن فود

خياله دوم(ن) قبالي يليّم بي خلايا جداد
وبهالمنوال أنا عايش وعند الله حل اعقود

انا عزمي ال جفا غيره ابطغا فرعون ذي الأوتاد
وانا جازم ال بقا حبّه لو انه بقّة النمرود

انا اللي ماصغي لهرج(ن)يولّف للجفا ترداد
وانا اللّي ما يبوّا لي سواة أم القعود اتهود

انا اللّي مارضى قلبي يوافق قعدة المرصاد
ولو انّه لمثل اللّي على حالي برى لكبود

سبايب ديني الواضح يردّ النفس للميراد
على نبع(ن)من اللّي جابه الخالي من المنقود

انا عندي خبرعيدي وفي ذمّة بصير اعياد
كفى لاتجهدون النفس وتشقونه بسلخ اجلود

أجل ياللّي تعذل القلب على رسلك تراي ستاد
بهذا والاّ ابغيره تفضّل وابذل المجهود