مالي ومال اللي سكن كرخ بغداد
بيني وبينه صافي الود ردّه
هو اشتهى يصير مع كل الاولاد
وانا اشتهي ماغير روحي تسدّه
كان الوفى ! مع صادق القول يزداد
واليوم اشوفه راح مع من يشدّه
إي والله الا راح والنيّه ابعاد
وانساه من صدّه عن اللي يودّه
انا حسبت الحب راسي كالاطواد
في ماكن الخفّاق ماحد يهدّه
واثر القلوب مهفهفه مالها ابلاد
مع الهبايب تنقشع مستعدّه
دوك المثل ياباغي(ن) علم الاسناد
أمس الوفاء واليوم جاني بصدّه
والقلب مايقبل ولو صابه اجهاد
في غير حب اللي تربّع بخدّه
لكنّ بي طنخه ولي عزّة اجداد
مايركّع الممرور كرب(ن) وشدّه
ما مات في ربق البهم كود الاوغاد
والا الرجال بثقلهم رسو أشدّه
إفرح عسى دنياك ماتْجيك بضهاد
وامرح قبل ماياصل العمر حدّه
اتبع هوى اللي بالمشاهي لك استاد
يعطيك من حلو الكلام ويمدّه
ولو سانعت كل الملاعيب بسْعاد
صيّورها كسر الخواطر بضدّه
مانيب متشفّي ولا قصدي اعناد
ولا ساقني علم(ن) توسّدت يدّه
ما غير ذا احساس في قلب منقاد
يكمى غلاك وقال من ذاك قدّه

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2019 - موقع الشعر - بواسطة شركة المبرمجين