الأمس الحاضر

يالأمس لازلت حيّ (ن) ما وقف نبضه
في مهجة اللي غدا ماسور بسْواره

يالامس وش بك عليّه تحكم القبضه
تلفّني لفّ سوّاق (ن) مسك طاره

ياليت عني تصدّ وتنوي الربضه
وترحم اللي تعذّب ونْطفت ناره

والا انت ديّان ماسْتوفى وقضى قرضه
وتْزيد دينك على راس السنه شاره

ماتْشوف حالي كما اللي تقرضه أرضه
وانا آترجى العوض وتْحمّد اشواره

خلاص تمّت اسنينك ونْتهى فرضه
اطلق سراحي وفك الملتهي بْداره

مادام ليّه وليف (ن) جاز لي عرضه
وانا هويته بطوله وباقي ادواره

غرو(ن) يلمّح وانا برقص على العرضه
من فرحتي به واحب الدار والحاره

خشف (ن)تربّى على الزملوق والبرضه
يدمي اكفوفه هوا النسناس وغْباره

أرجوك ياللي تعرْفه وزاير(ن) ارضه
قلّه ترى عندنا قدره ومقداره

ون شفتها قد تكدّر خاطره فرْضه
ما يْصير يمسي اخْشيف الريم بكْداره

وقلّه ترى منْكتبْ أقراه واعرْضه
في كل ليله على قلبي مع اسراره

وقلّه أنا بالبحر وهي لي الفرضه
من جملة اشْهر وانا اجدّف الى انْواره

وقلّه تراني بعد في غيرها مرْضه
هي دنيتي هي سعادة حظي اوكاره

وان كان جالك جواب(ن) منه في غمضه
مع ضحكة احجاج افبشّرني ولك ابشاره