القــــــاف هيـــضني

مالوم ياقلب(ن) شرب حب غاليه
بصْباه وباقي به ال بعد المشيبه

لو ماحصل له ماشكى بعْد جافيه
صابر ورب الكون أعلم بغيبه

ماجابته سود الليالي اتوديه
وكف القدر ماشي على من يصيبه

ماهيب بالرغبه وكثر المشاريه
لو كان حطينا عجيب وعجيبه

البيه ما وصْلت مغازيه للبيه
ولا شرب من صافي(ن) في قليبه

لكنّ ما ودّه يعدّي مفاليه
تم الرضى في عيشته بالغليبه

لاهوب لاغافل ولا صابه التيه
مير الامور أصعب من اللي صعيبه

القاف هيضني على طول اجاريه
حرّك بي المكنون واشْعل لهيبه

لو كان مالي بالمودّا وراعيه
وماخصني به من بعيد وقريبه

غصب علي ياصاح امشي واداريه
ومالي بترفات الصبايا طليبه

أبيع باوّل سوم غيره ونحّييه
من أول الخرخير لقْصى القليبه

ماجر قلبي غير قاسي مساحيه
واليوم بذره شارعات(ن)رطيبه

مسوي(ن) بالقلب قصر(ن) وشاليه
مايدخله غيره بغصب(ن) وطيبه

والنفس بيْد القلب عميا تْباريه
تبي رضاه اوخانعه مستجيبه

فلو(ن)نجيب ولايق(ن) لي واناابيه
وعْرف مداه ونبض قلبه وطيبه

هو طب سقمي والشهَد بين اشافيه
هو راس مالي عم حالي صحيبه

أفرح إليا نادا وانا اقول لبّيه
ومْشي بطوع ايديه ودْرى نحيبه

ينعتني الغالي وانا والله اغليه
ماله مثيل(ن) بالحياة التهي به

اشيل بعْلا الصوت اسمه واناديه
واما وصل صوتي احساسه دري به

دام الوفاء عنوان ماني مخلّيه
لودونه العسكر وقامت حريبه