الـحـــــــــب يا صـــــــــــــاحـبـي

الحب ماهو لقيمات(ن) بها شيره
الى ارتفع سكّرك خلّيتها اجنابه

الحب ياصاحبي تقبل مخاسيره
تركع لو انّك عزيز النفس واللابه

الحب عوّد بعنتر يسكن الديره
وهامة ابا زيد جابه وانكسر نابه

الحب سخّر ملوكٍ تدفع النيره
نحّوو على الجنب شعبٍ يرتجي جابه

الحب روّض نفوسٍ تطلب الخيره
اركى على ثومته نابه ومشعابه

الحب دوّّخ ابن عدوان مع زيره
وابن سبيّل وبصري وانشد حجابه

الحب بيّد كبير القوم وصْغيره
ياعظمها من مشقّه لنْفتح بابه

الحب سلطه وعسراتٍ مشاويره
مايرّجهن من تقعّد له ومن صابه

الحب قاسي وعند الله تدابيره
ماهيب بيدك تعدّل به وتنحا به

الحب لو هو عذاب(ن) زاد تطويره
به لذّة عاشها من زاد بعْذابه

الحب تقنع الياجت لك معاذيره
تصخي بمالك وتصغي له وتسلا به

الحب قبلي تغنّى به مشاهيره
منهم ابو زيد سلاّ نفس منصابه