أميرة

الشعر وان جيت اكتبه في أميره
يحضر لي المعنى بعد فترة غياب

لعيونها نخلّي الكبيره صغيره
من غيرها يستاهل الشعر جلباب

باحلى القصايد هالأميره جديره
مشاعري لعيونها شعر تنساب

الشعر هي نفحة شذاه وعبيره
قافٍ بها يرقا على راس مرقاب

أن ما كتبته لجلها وش مصيره
مدامها تغريه باسلوب جذاب

هي بارقه هي روضته هي غديره
سحابةٍ رعادها يوم ما خاب

بسمه وطلّت للسعاده بشيره
منين ما لدّيت لا .. كلّي اعجاب

هي سيرةٍ للصبح عن ألف سيره
في وجهها يشرق سنا النور ما غاب

عيونها تحكي سوالف كثيره
والخوف لا قصّرت يلحقني عّتاب

حبيبتي دايم بشوقي كبيره
كذا من الله والغلا ماله اسباب

كلّي وله والشوق فيني تثيره
عسى السعاده ما تفارق لها باب

الاسم اميره بس فعلاً أميره
حازت على تاج الغلا بين الاحباب