سكرة الموت

ياخوفي انها بنت الاجواد ملّت
عامين مرّن ما سمعنا لها صوت

عهد المحبه كان عنّه تخلّت
وش عاد باقي لي سوى (سكرة الموت)

منولّن لا جات ثمٍ .. تجلّت
بصبحٍ تعاند فيه مع الكرز توت

غندورةٍ عقب الزعل لا اسفهلّت
طوّحت باعلى الصوت (ياعقاب) وش (نوت)

تمكنت من خافقي .. واستحلّت
توطنّت به واعمرت وسطه بيوت

وفي روضته (ذيدانها) سنين فلّت
تقطف زهر ما عاركت (رمث محتوت)

يسقيك يومٍ فيه بالقلب حلّت
من يوم حل وحبل الايام مفلوت

كل ما حسبته ضاع من يوم طلّت
طلّت فرح منها رقص (ليل بيروت)

جت بالبياض وسود الايام ولّت
جتني فرح يشدي نصر (عين جالوت)

واليوم غابت والمعاذير كلّت
وش عذرها عامين ما جادت بصوت

أن كانها عن عشرتي اليوم ملّت
ما عاد باقي لي سوى (سكرة الموت)