الحاجة

لـ محمد بن فرزان، ، في غير مُحدد

الحاجة - محمد بن فرزان

والله انا ما احتجت بالوقت حاجه
الا يلد بنظرة العين يمّي

غلاه مشعل في زماني سراجه
من دون هالعالم عدا ابوي وامّي

غروٍ ملك بالعقل والحسن تاجه
متى يزول بشوفته كل همّي

متى زماني يبتسم وانتواجه
وتبرى جروحٍ عكرّت صفو دمّي

متى يتعدل فالزمان اعوجاجه
الى متى وحظوظنا ما تسمّي

الى متى نرجي زمنا اندماجه
الى متى واحلامنا ماتتمّي

حلمٍ زرعته والامل في نتاجه
مدري متى خيره علينا يعمّي

حلمٍ ورى حلمٍ يزيد ازدواجه
متى بختنا في فرجها يهمّي

الى متى والقلب زايد خلاجه
والصبر عيّا لعلمنا لا يضمّي

ياما احتذيت الصبر في برج عاجه
لا شك عيّا الا أني اقول عمّي

ما يدري اني ان قلتها له سماجه
وحرام ما يشدي بها يوم فمّي

والله ما احقق رغبةٍ في مزاجه
ان جاد والا طلبةٍ ما تهمّي

والله ما اوّطّي هامتي في مداجه
دام العسل مدسوس به كل سمّي

ولا نيب انا اللي ينعقد به حجاجه
انا الذي بالطايلات متسمّي

ركايبي ماهيب تارد هماجه
مانيب انا آرد (قلتةٍ) لي تضمّي

لو ان قيضي يطرّد به زراجه
وهبايبٍ روس الشجر له تخمّي

في لاهبٍ بالقيض يعلن هياجه
ولمعة سرابٍ (بالطوارف) يزمّي

اليا وردت آرد بعدٍ خراجه
يقطع ضما طرشٍ عليه متحمّي

حداه من قيض الزمان وعجاجه
وارتاد من بين المواريد جمّي

جمٍ يجي للورد فيه اعتلاجه
وراع الهزيل يقول ماأبتل كمّي

ما أحسب انا لعقد(الرشا) وانفراجه
ادلي بدلوي لينه يزول غمّي

انهل قراحه وابتعد عن رجاجه
ما هوب انا اللي لصيدته ما يدمّي

العز نرقا في سلالم سياجه
إيلين ذعذاع الهوى له نشمّي

والله لو من دونه الف انزلاجه
والله ان يبشر فيه راع المعمّي

بوجيهنا لضيق الزمان انبلاجه
لا ضيقّت والله ما نستهمّي

لو الزمن نقرا عليه إنزعاجه
ان مامنحنا لسيرته ما نذمّي

ندري لو أنه ضاق عنق الزجاجه
تفرج على اللي لطاعة الله ينمّي

بالنايبه يبين راع المواجه
اللي معنّز بين خالٍ وعمّي

ويومي طلبت الصبر في برج عاجه
الله كريم وجعلها ما تتمّي

اقولها ما عاد لي فيه حاجه
ولا ابغى يلد بنظرة العين يمّي

© 2024 - موقع الشعر